Azərbaycan, Bakı, 18 iyun /Trend, müxbir Q.Vəliyev/
2012-ci ildə Azərbaycanın bütün orta təhsil müəssisələri genişzolaqlı internet şəbəkəsinə qoşulacaq, - rabitə və informasiya texnologiyaları naziri Əli Abbasov Azərbaycan Diplomatik Akademiyasında çıxışı zamanı deyib.
Abbasovun sözlərinə görə, hazırda qlobal şəbəkəyə qoşulmaq imkanı olan orta məktəblərin sayı 700-dür. İlin sonunadək daha 300 məktəbin qoşulacağı planlaşdırılır.
"2011-ci ildə orta təhsil müəssisələrinin, təxminən, 70 faizi internet şəbəkəsinə qoşulmaq imkanı əldə edəcək. 100 faizlik səviyyənin 2012-ci ildə əldə ediləcəyi gözlənilir. Hazırda Azərbaycanın orta təhsil müəssisələrinin kompüterləşdirilməsinin səviyyəsi Şərqi Avropa ölkələrindəki kompüterləşdirilən məktəblərin səviyyəsinə uyğundur. Azərbaycanda 4 500 məktəb fəaliyyət göstərir. Əgər 2005-ci ildə hər üç məktəbə bir kompüter düşürdüsə, hazırda bir kompüter 25 şagirdin payına düşür. İldən-ilə elektron kontingentin sayı artır", - nazir vurğulayıb.
Orta təhsil müəssisələrinin kompüterləşdirilməsində əsas məqsəd İT-dən istifadə etməklə təhsilin keyfiyyətini artırmaq üçün vahid təhsil informasiya mühitinin yaradılması və ölkənin dünya təhsil sisteminə inteqrasiyasıdır. Bu, öz növbəsində, ölkənin təhsil sistemini effektiv idarə etməyə və xarici ölkə təhsil müəssisələri ilə internet vasitəsilə əlaqə yaratmağa imkan verəcək.
