Azərbaycan, Bakı, 13 iyul /Trend, müxbir H.Vəliyev/
Naxçıvan Muxtar Respublikasında (NMR) hər 19 şagirdə bir kompüter düşür. Bu barədə NMR-in Rabitə və İnformasiya Texnologiyaları Nazirliyinin məlumatında deyilir.
Məlumata görə, hazırda NMR-in ümumtəhsil müəssisələrində istifadə olunan fərdi kompüterlərin 73,9 faizi internet şəbəkəsinə qoşulub.
Ümumtəhsil müəssisələri üzrə fərdi kompüterlərin ümumi sayı 2674 ədəd təşkil edir.
Ümumilikdə Azərbaycanda hər 26 şagirdə bir kompüter düşür.
Mayın əvvəlindən etibarən Azərbaycan Təhsil Nazirliyi ölkənin orta təhsil müəssisələrinin kompüterləşməsi üzrə növbəti mərhələyə başlayıb.
İlin sonunadək nazirlik rayon mərkəzlərində yerləşən orta təhsil müəssisələrini əhatə etmək niyyətindədir.
Cari ildə məktəblərin kompüterləşməsinə 16 milyon manat xərclənəcək. İşlər Azərbaycanın təhsil sisteminin 2008-2012-ci illərdə informasiyalaşdırılması üzrə Dövlət Proqramı çərçivəsində həyata keçirilir.
Layihənin başlıca məqsədi İT-dən istifadə etməklə təhsilin keyfiyyətinin yaxşılaşdırılması üçün vahid informasiyalaşdırılmış təhsil mühitinin yaradılması və ölkənin dünya təhsil sisteminə inteqrasiyasından ibarətdir.