Azərbaycan, Bakı, 16 avqust /Trend, müxbir Q.Vəliyev/
Azərbaycanın "BakuTel-2010" informasiya-kommunikasiya texnologiyaları üzrə beynəlxalq sərgisi çərçivəsində Belarus tərəfi ilə informasiya-kommunikasiya texnologiyaları sahəsində ikitərəfli əməkdaşlıq məsələsinin müzakirə edilməsi gözlənilir. Bu barədə Trend-ə bazar ertəsi Azərbaycan Rabitə və İnformasiya Texnologiyaları Nazirliyinin elmi potensial və strateji planlaşdırma şöbəsinin direktoru İsfəndiyar Əliyev deyib.
Əliyevin sözlərinə görə, görüş çərçivəsində İKT sahəsində əməkdaşlıq üzrə işçi qrupun yaradılması da gözlənilir. İşçi qrupun ilk iclasının 2011-ci ilin birinci yarısında Belarusda biznes-forum çərçivəsində keçirilməsi gözlənilir.
Bugünədək Azərbaycan Belarus tərəfinə işçi qrupun üzvlərinin siyahısını təqdim edib və Belarus tərəfdən analoji siyahını gözləyir.
İşçi qrupun fəaliyyət planına ikitərəfli münasibətlərin formalaşdırılması, "elektron hökumət" sahəsində əməkdaşlıq, informasiya cəmiyyətinin inkişafı, İKT sahəsində birgə müəssisələrin yaradılması və daxili bazarlarda onların inkişafına köməyin göstərilməsi, kadrların hazırlanması və texnoloji parkların yaradılması məsələləri daxil olacaq.
Əliyev texnoloji parkın yaradılması məsələsinə toxunaraq qeyd edib ki, Belarusun təcrübəsi Azərbaycanda regional innovasiya zonalarının (RİZ) yaradılması layihəsində istifadə oluna bilər.
"Bugünədək hökumət tərəfindən Azərbaycanda regional innovasiya zonalarının yaradılması üzrə təklif baxılmaq üçün artıq göndərilib və müvafiq strukturlarla razılaşdırılıb. Və biz ümid edirik ki, bu sənəd payızda müzakirəyə çıxarılacaq", - Əliyev qeyd edib.
Hazırda nəzərdən keçirilən vacib məsələlərdən biri vergi, sosial və gömrük rüsumlarının azaldılması, bəzi hallarda isə tam sıfırlaşdırılma məsələsidir. Bu məsələlərin müsbət həlli Azərbaycana məhsul idxalına və ölkə ərazisində xarici investorların məhsullarının gələcəkdə regional bazarlara ixrac edilməsinə, istehsal xəttinin yaradılmasının təşkilinə əlverişli şərait yaradacaq.
Nazirliyin proqnozlarına görə, layihə uğurla həyata keçiriləcəyi təqdirdə, RİZ-dən əldə olunacaq gəlir 2020-ci ilədək 12 milyard dollara çatacaq.
Azərbaycanda RİZ kiçik və orta innovasiya sahıbkarlığının inkişafı, elektrik avadanlıqlarının istehsalı və ixracatı üzrə regional bazaların yaradılması və proqram təminatı, ölkənin effektiv tranzit informasiya mərkəzinə çevrilməsi, formalaşan informasiya cəmiyyəti üçün insan resurslarının hazırlanması və inkişafı, müxtəlif sahələrdə informasiya texnologiyalarının tətbiq edilməsi üçün texnoparkların yaradılmasını nəzərdə tutur.
