Аzərbaycan, Bakı, 1 sentyabr /Trend, müxbir H.Vəliyev/
Naxçıvan Muxtar Respublikası Rabitə və İnformasiya Texnologiyaları Nazirliyi ümumi istifadə telefon şəbəkəsi vasitəsilə göstərilən rabitə xidmətləri gəlirlərinin müntəzəm monitorinq və təhlilinin aparılması haqqında qərar qəbul edib. Bu barədə nazirlikdən verilən məlumatda deyilir.
İdarədən verilən məlumata görə, monitorinqlər mövcud problemlərin aşkara çıxarılması və həll olunması, həmçinin, göstərilən xidmətin keyfiyyətinin artırılması məqsədilə müntəzəm şəkildə aparılacaq.
Nazirlikdən verilən son məlumatlara görə, hazırda mobil rabitə şəbəkəsində ATS telefon qovşaqları vasitəsilə zənglərin həcmi 34 faiz, respublikadaxili zənglər 42,3 faiz, MDB ölkələrinə zənglər 0,07 faiz, İran, Türkiyəyə -18 faiz, Avropa və Amerikaya - 0,005 faiz təşkil edir.
NMR-in Rabitə Nazirliyi, həmçinin, servis istifadəçilərinin sayının artırılması üzrə müvafiq tədbirlərin görülməsi haqqında qərar qəbul edib. Bu məqsədlə nazirlik NGN şəbəkəsinin imkanları və bu texnologiya bazasında göstərilən xidmətlərlə əhalini tanış etmək istiqamətində genişmiqyaslı aksiya keçirmək niyyətindədir.
Hazırda Naxçıvan şəhəri, Şərur, Sədərək, Şahbuz, Kəngərli, Ordubad, Culfa və Babək rayonları üzrə ATS-lərin ümumi sayı 94 ədəd təşkil edir ki, onların 72-si elektrondur.
Naxçıvan şəhərində yeddi elektron ATS fəaliyyət göstərir ki, bunların 5-i NGN şəbəkəsinə keçirilib. NGN-nin tətbiqi əhaliyə səsli xidmətlərlə yanaşı, 30-dan çox yeni xidmət göstərməyə imkan yaradıb.
