Azərbaycan, Bakı, 22 noyabr /Trend, müxbir H.Vəliyev/
Azərbaycanın internet servis provayderləri regional səviyyədə biznesin qurulmasında maraqlı deyillər. Bu barədə bazar ertəsi Azərbaycan rabitə və informasiya texnologiyaları nazirinin müavini Elmir Vəlizadə deyib.
Nazir müavinin sözlərinə görə, bu gün həm AzTelekom İstehsalat Birliyinin, həm də AzDATACOM-un şəbəkəsindən istifadə edə biləcək provayderlərin regional genişlənməsi üçün bütün lazımi şərait var.
"Hələ 2005-ci ildə Azərbaycan rabitə və informasiya texnologiyaları naziri Əli Abbasovun təşəbbüsü ilə internet-provayderlərin regionlara əvəzsiz çıxışı üçün şərait yaradılmışdı və bu təşəbbüs iki ilə yaxın davam edib. Lakin təəssüf ki, provayderlər bu imkandan istifadə etmədilər. Məsələ ondadır ki, hətta belə şərait yaradılarkən provayderlərdə maraq müşahidə edilmir", - Vəlizadə qeyd edib.
İnternet-provayderlərin fəaliyyətinin lisenziyalaşdırılması məsələsinə gəldikdə, Vəlizadənin sözlərinə görə, gündəlikdə belə bir məsələ dayanmır.