Azərbaycan, Bakı, 6 dekabr /Trend, müxbir H.Vəliyev/
2011-ci ildə Bakı Telefon Rabitəsi İstehsalat Birliyinin şəbəkəsində genişzolaqlı qoşulmaların sayı 200 mini ötəcək. Bu barədə bazar ertəsi İB-nin baş direktoru Beytulla Hüseynov deyib.
Hüseynovun sözlərinə görə, hazırda bu rəqəm 100 mini ötür.
"Bu xidmət növünün hazırlanan inkişaf strategiyasına əsasən, Birlik tərəfindən yeni telekommunikasiya avadanlığının alınması planlaşdırılır ki, bu da sözügedən servisə qoşulmaq üçün portalların sayını artırmağa və genişzolaqlı internet istifadəçilərinin dairəsinin genişlənməsinə imkan verəcək", - Hüseynov bildirib.
Onun sözlərinə görə, bu gün ADSL xidmətlərinə qoşulmaqla bağlı problem müşahidə edilmir, belə ki, operatorun telefon şəbəkəsində öz şəbəkə infrastrukturu ilə yanaşı, Bakı Telefon Rabitəsində 25 özəl servis provayder fəaliyyət göstərir.
IP-TV xidmətlərinə toxunan İB-nin rəhbəri deyib ki, tətbiqi NGN (Next Generation Network) şəbəkəsinə keçdikdən sonra mümkün olan xidmətlərin bu növü də istifadəçilərdə maraq doğurur.
"NGN şəbəkəsinin əsas üstünlüyü ondan ibarətdir ki, vahid telefon şəbəkəsi ilə abonentlərə bir neçə multimedia xidmətini təklif etmək olar, bunlardan biri IP-TV-dir. Bu xidmətlərdən bu gün bir mindən çox genişzolaqlı internet abonenti istifadə edir. Gələn il üçün biz Bakı Telefon Rabitəsinin bütün şəbəkə infrastrukturunda İP texnologiyadan istifadənin artırılması üzrə plan hazırlamışıq", - Hüseynov vurğulayıb.
