Azərbaycan, Bakı, 8 fevral /Trend, müxbir H.Vəliyev/
"AzeriCard" Prosessinq Mərkəzi martda mobil bankinqin yeni versiyasını təqdim edəcək. Bu barədə çərşənbə axşamı Trend-ə mərkəzin biznesin inkişafı üzrə rəhbəri Cahangir Məmmədov deyib.
Məmmədovun sözlərinə görə, mobil bankçılığın əsas fərqləndirici cəhəti ondan hər üç mobil rabitə operatorunun şəbəkəsində istifadənin mümkünlüyü olacaq.
"Hazırda mobil rabitə operatorları bu sistemin tətbiqinə texniki baxımdan hazırdırlar. Yeni versiya daha funksional olacaq. Onda texniki səbəblərə görə indiki versiyada olmayan əlavə funksiyalardan istifadə etmək mümkün olacaq. İstifadəçilər müxtəlif kateqoriyalı ödənişlər etmək imkanı əldə edəcəklər. Biz bu xidməti maksimal təkmilləşdirmək və onu müştərilər üçün daha rahat etmək niyyətindəyik", - Məmmədov qeyd edib.
Xidmətə telefona əlavələri yükləməklə qoşulmaq olar.
Mobil bankinq xidməti sutka ərzində onlayn rejimdə hesab balansını yoxlamağa, hesab üzrə əməliyyatların hesabatlarını formalaşdırmağa, elektrik enerjisi, mobil və stasionar rabitəyə, İnternet xidmətlərinə görə ödənişləri etməyə, pul vəsaitlərini kartdan karta köçürməyə, elekton aviabiletin ödənişini etməyə və hər aparılan əməliyyat üçün (hesabdan vəsaitin çıxarılması və ya daxil olması) SMS-bildiriş almağa imkan verir.
Hazırda mobil bankinq xidmətini Azərbaycan Beynəlxalq Bankı, Respublika Bankı, AGBank, AtaBank, Bank of Azerbaijan, Bank Standard, Nikoil Bank, ParaBank və Xalq Bank göstərirlər.
İndi xidmətlərdən istifadə etmək üçün "Azercell Telekom"un şöbələrində SİM-kart almaq və ya "MobilBank" əlavəsi ilə dəyişmək lazımdır. Bundan sonra plastik kartı verən bankın filialına müraciət etmək və xüsusi formanı doldurmaq lazımdır. Bank "MobilBank"dan istifadə üzrə təlimat verəcək və xidmətə qoşacaq.
"MobilBank" sistemində bütün ötürülən məlumat şifrələnir. Nömrə sahibləri PİN-kodu formalaşdırır, identifikasiya (eyniləşdirmə) üçün isə yalnız istifadəçiyə məlum olan paroldan istifadə olunur.