Azərbaycan, Bakı, 19 fevral /Trend, müxbir H.Vəliyev/
İran Azərbaycanın təşəbbüskarı olduğu "Şərq-Qərb" transmilli informasiya supermagistralı telekommunikasiya layihəsində öz iştirakının mümkünlüyünə baxır. Bu barədə şənbə günü Trend-ə İranın rabitə naziri Rza Tağıpur məlumat verib.
Tağıpurun sözlərinə görə, bu gün İran Şərq və Qərb ölkələri ilə, eləcə də ölkəyə trafikin daxil olduğu Şərqi Asiya ölkələri ilə əlaqələri inkişaf etdirir.
"Əgər Azərbaycanın "Şərq-Qərb" transmilli informasiya supermagistralının tikintisi ilə bağlı təşəbbüsünü başqa ölkələr dəstəkləyərsə, biz öz növbəmizdə bu məsələni gündəliyə daxil etməyə hazırıq", - Tağıpur bildirib.
"Şərq-Qərb" layihəsi ümumilikdə 20 ölkəni birləşdirəcək və regionun inkiaşfı üçün mühüm rol oynayacaq. Layihənin həyata keçirilməsi Qərbi Avropa və Sakit okean hövzəsinə daxil olan ölkələr arasında "informasiya uçurumu"nu aradan qaldırmağa imkan verəcək.
Layihə iki mərhələdə həyata keçiriləcək. Birinci mərhələ Şərqi Avropadan Çinə qədər Xəzərin dibi ilə kabel magistralının çəkilməsini nəzərdə tutur. İkinci mərhələ çərçivəsində Avrasiya, o cümlədən Mərkəzi Asiya ölkələrinin sərfəli tariflərlə qoşulması təmin olunacaq.
Bu il region ölkələrinin dəstəklədikləri "Şərq-Qərb" layihəsi üzrə konsorsiumun yaradılması haqqında memorandumun imzalanacağı gözlənilir və bu gün layihəni dəstəkləyən tərəflərlə danışıqlar aparılır.
Bu gün artıq aralarında Azərbaycan, Rusiya, Türkiyə, Gürcüstan, Qazaxıstan və Çinin olduğu altı ölkənin aparıcı telekommunikasiya operatorları ilə danışıqların birinci mərhələsi başa çatıb. Konsorsiumun yaradılması layihənin kommersiya baxımından həyata keçirilməsinin əsasını qoyacaq.
Azərbaycanın "Şərq-Qərb" transmilli informasiya supermagistralının yaradılması üzrə təqdim etdiyi qətnamə BMT-nin 66-cı plenar iclası çərçivəsində qəbul olunub. Təşkilat "informasiya uçurumu"nu, yoxsulluq səviyyəsinin azaldılmasını, iqtisadiyyatın rolunun yüksəldilməsini və regionun inkişafı üçün lokomativ rolu oynayacaq layihəni dəstəkləyib.
