Azərbaycan, Bakı, 18 mart /Trend, müxbir H.Vəliyev/
Azərbaycan Milli Elmlər Akademiyasının İnformasiya Texnologiyaları İnstitutu (İTİ) AzScienceNet elmi kompüter şəbəkəsinin təhlükəsizliyini təmin etmək üçün Fransanın NetASQ şirkətinin həllərindən istifadə imkanını nəzərdən keçirir. Bu barədə Trend-ə cümə günü İTİ-nin direktoru Rasim Əliquliyev deyib.
Əməkdaşlıq məsələləri institut və NetASQ rəhbərliyi tərəfindən Bakıda keçirilən görüşdə müzakirə edilib. Görüş çərçivəsində şəbəkə təhlükəsizlik sistemləri, bu sahədə texnologiya və həllər nümayiş etdirilib.
Əliquliyevin sözlərinə görə, NetASQ şirkəti ilə Azərbaycanda təqdim ediləcək kommersiya təkliflərinə birgə dəstək və iştirak barədə razılıq əldə edilib.
NetASQ şirkəti Avropanın aparıcı peşəkar internet təhlükəsizlik vasitələri istehsalçısıdır. O, şəbəkələrarası ekranların və real ASQ vaxtı rejimində qeyri-qanuni istifadədən müdafiənin unikal müdafiə texnologiyası tətbiq edilməklə, qeyri-qanuni istifadədən müdafiə funksiyası ilə VPN-həllərin istehsalı və distribusiyası ilə məşğul olur.
"NetASQ ilə əməkdaşlıq informasiya təhlükəsizliyinin komponentlərindən biri olmaqla, AzScienceNet elmi kompüter şəbəkəsinin bazasına da əsaslanan AZ-CERT kompüter insidentlərinə reaksiya komandasının dəstəklənməsi imkanını nəzərdə tutur", - Əliquliyev bildirib.
Hazırda institut AZ-CERT kompüter insidentlərinə reaksiya komandasının Trans-Avropa Elmi-Tədqiqat və Təhsil Şəbəkəsi Assosiasiyasında (Trans-European Research and Education Networking Association - TERENA) akkreditasiyası üzrə işlər aparır.
AZ-CERT çərçivəsində bu gün artıq internet mühitində anomal təzahürlərin və fövqəladə halların monitorinqi aparılır, virusların vaxtında aşkar edilməsi və digər tədbirlər həyata keçirilir. Bu, internet şəbəkəsinin bilavasitə təhlükəsizliyinə və keyfiyyətinə təsir göstərir.
Əliquliyevin əvvəllər dediyinə görə, reaksiya qrupunu yaratmaqla institut bir sıra texnoloji və təşkilati tədbirlər keçirmək barədə üzərinə öhdəlik götürüb. AzScienceNet elmi kompüter şəbəkəsi üçün artıq Elmlər Akademiyası tərəfindən qəbul edilən internetdən istifadə siyasəti işlənib hazırlanıb.
Təhlükəsizlik siyasətinin hazırlanması üzrə işlər aparılır, internet mühitində etik normalara əməl edilməsini, təhdid və təhlükə imkanlarının məhdudlaşdırılmasını nəzərdə tutan hüquqi sənədlərin qəbul edilməsi planlaşdırılır. Perspektivdə AZ-CERT-in fəaliyyəti operativ reaksiya və informasiya təhlükəsizliyi ilə əlaqədar insidentlər haqqında informasiyanın yığılması ilə məhdudlaşmayacaq. O, analitik-elmi tədqiqatların aparılmasını və bu sahədə beynəlxalq qurumlarla əməkdaşlığı nəzərdə tutacaq.