Azərbaycan, Bakı, 30 mart /Trend, müxbir H.Vəliyev/
"Microsoft Azerbaijan" şirkəti Azərbaycanın təhsil müəssisələri üçün live@edu servisini işə salır. Bu barədə çərşənbə günü "Microsoft Azerbaijan" şirkətinin "Təhsildə tərəfdaşlıq" proqramı üzrə meneceri Emin Axundov deyib.
live@edu servisi təhsil müəssisəsinin domenində poçt qutusudur, təhsil almağa, dostlarla ünsiyyət qurmağa və öz vaxtını idarə etməyə imkan verən çoxlu faydalı servislərdə istifadəyə şərait yaradan servisdir.
"İlkin olaraq bu layihə mayda işə salınacaq. Yeni servis hər bir müəllimə, şagirdə və tələbəyə öz poçt akkauntunu almağa imkan verəcək, bu isə öz növbəsində təhsilalma prosesini daha effektiv edəcək", - Axundov qeyd edib.
live@edu servisinin interfeysi Azərbaycan dilinə tam lokallaşdırılıb və ondan pulsuz istifadə etmək mümkündür.
Servisi "Elektron məktəb" layihəsinin həyata keçirildiyi məktəblərdə işə salmaq planlaşdırılır. Müəllimlər üçün bu servisdən istifadə üzrə treninqlər təşkil ediləcək.
"Layihənin mahiyyəti təhsil müəssisələrinin kompüterləşdirilməsi prosesini daha effektiv etməkdən ibarətdir. Hər bir şagirdin elektron ünvanının olması hər gün fərdi tapşırıq almağa imkan verir, kompüterin alınması prosesi isə alışı "sırımaq" kimi görünməyəcək. Bu, biliyin artırılması üçün lazımi atribut olacaq", - Axundov qeyd edib.
