Azərbaycan, Bakı, 8 aprel /Trend, müxbir H.Vəliyev /
Azərbaycan Regional Rabitə Birliyinin (RRB) rabitə administrasiyalarının Ümumdünya Radiorabitə Konfransı (ÜRK-12) və Radiorabitə Assambleyasının (RA-12) konfranslarına tezlik resurslarının paylanması üzrə təkliflərin işlənməsində iştirakını davam etdirəcək. Bu barədə Rabitə və İnformasiya Texnologiyaları Nazirliyinin Dövlət Radiotezliklər İdarəsinin (DRİ) məlumatında deyilir.
Təkliflərin müzakirəsi aprelin 11-15-də Özbəkistanda keçiriləcək bu tədbirlərə hazırlıq üzrə işçi qrupun 7-ci iclası çərçivəsində aparılacaq.
Azərbaycanı iclasın işində DRİ-nin Koordinasiya və beynəlxalq münasibətlər şöbəsinin rəhbəri Mehdi Ağagülov və Radiotezliklər üzrə Dövlət Komissiyasının katibi Salman Hüseynov təmsil edəcəklər.
Bir müddət əvvəl Ağagülovun Trend-ə bildirdiyi kimi, Azərbaycan tezlik resurslarının Regional Rabitə Birliyinin (RRB) iştirakçıları arasında bərabər bölüşdürülməsinin tərəfdarıdır. Onun sözlərinə görə, bu məsələ son illər aktuallaşıb və hazırda Azərbaycan RRB-nin tərkibinə daxil olan digər ölkələr kimi, RRB və Avropanın CEPT (Conference of European Posts and Telegraphs) təşkilatı arasında tezlik mənsubiyyətlərinin və peyk orbitlərinin bərabərhüquqlu müəyyənləşdirilməsinə tərəfdardır.
Azərbaycan geostasionar peyklərin orbitlərində "kağız peyklər" (orbitin alınması üçün buraxılmayanlar) üçün mövqeyin tutulmasına imkan verməyən beynəlxalq hüquq mexanizmlərinin hazırlanması prosesinə də tərəfdardır.
"Kağız peyklər"in geostasionar peyklərin mövqelərinin mənimsəməsi praktikası orbitdən effektiv və səmərəli istifadəni yubadır və ondan bərabər istifadə hüququnu pozur.
