Azərbaycan, Bakı, 8 iyun /Trend, müxbir H.Vəliyev/
Azərbaycanın kabel televiziyası operatoru B&BTV Communications Naxçıvan ərazisində rəqəmsal televiziya yayımı üçün məsləhətçiləri cəlb edir. Bu barədə Trend-ə çərşənbə günü şirkətin marketinq və satış şöbəsinin meneceri Samir Mahmudov deyib.
Onun sözlərinə görə, bu gün əsas avadanlıq, kodlaşdırma və müdafiə avadanlığı sistemləri tədarükçüsünün seçilməsi məsələsi müzakirə edilir.
"Rəqəmsal yayımın təşəkkülü üçün bizə lisenziya verilib və lazımi tezliklər verilib. Hazırda bizim üçün əsas məsələ müvafiq sənədləşmənin hazırlanması, lazımi avadanlığın alınması üçün tenderin keçirilməsi, inteqrator və rəqəmsal yayım şəbəkəsinin qurulmasında təcrübəyə malik insanların cəlb edilməsidir.
Şirkətin proqnozlarına görə, bu istiqamətdə işlər ilin sonuna başa çatdırılacaq. Bundan sonra şirkət artıq muxtar respublikanın ərazisində rəqəmsal kabel efir televiziyası xidmətlərinin göstərilməsinə başlayacaq.
"Biz artıq Naxçıvan Televiziya və Radio Şurası ilə ödənişli kanalların siyahısını razılaşdırmışıq. Ödənişli paket orta hesabla 60 kanaldan ibarət olacaq, pulsuz sosial paketə isə bütün yerli kanallar və muxtar respublikanın iki telekanalı "Kanal 35" və "Naxçıvan TV" daxil ediləcək", - Mahmudov bildirib.
Onun sözlərinə görə, bundan başqa, gündəlikdə Bakı, Abşeron yarımadası və Sumqayıtın ərazisində rəqəmsal televiziya yayımı üçün tezlik resurslarının alınması məsələsi durur. Bu, şirkətə perspektivdə respublikanın bütün ərazisini rəqəmsal televiziya ilə mərhələlərlə əhatə olunmasını genişləndirməyə imkanı verəcək.
Bakı ərazisində rəqəmsal televiziyanın keçidi 2012-ci ilin əvvəlində gözlənilir.