Azərbaycan, Bakı, 9 iyun /Trend, müxbir H.Vəliyev/
Ümumdünya Əqli Mülkiyyət Təşkilatı (ÜƏMT) innovasiya və yaradıcılığın stimullaşdırılması üçün əqli mülkiyyət sistemindən istifadəyə yardım göstərəcək. Trend-in məlumatına görə, bu barədə cümə axşamı ÜƏMT-nin DCEA (Divisionfor Certain Countriesin Europeand Asia) proqramının əməkdaşı İlya Qribkov Standartlaşdırma, Metrologiya və Patent üzrə Dövlət Komitəsi və Ümumdünya Əqli Mülkiyyət Təşkilatının birgə təşəbbüsü ilə təşkil edilən seminarda deyib.
Qribkovun sözlərinə görə, bu, prioritet vəzifədir. Bunun üçün müvafiq alətlər hazırlanıb. Hazırda o, Ümumdünya Əqli Mülkiyyət Təşkilatının DCEA proqramında iştirak edən bütün 33 ölkə tərəfindən qəbul edilib. Onlardan biri də Azərbaycandır.
"Artıq ölkələrə əqli mülkiyyət sahəsində öz milli strategiyalarının hazırlanmasında kömək edəcək daha beş alətin hazırlanması barədə qərar qəbul edilib. İşlənib hazırlanmış alətlərin siyahısı var. Onların yarısından artıq istifadə mümkündür, yarısı isə indi işlənilir. Əsas sənəd əqli mülkiyyət sahəsində strategiyanın işlənməsi üzrə rəhbərlik etməkdir. Bu, fəaliyyətimizin təməli və yaxın vaxtlar üçün prioritet vəzifədir", - Qribkov əlavə edib.
Onun sözlərinə görə, bütün qalan alətlər komponentdir, lakin buna baxmayaraq, onların hamısı ayrı-ayrılıqda istifadə edilə bilər, çünki əqli mülkiyyətin müxtəlif aspektlərinə aiddir.
Ümumi strategiyanın məqsədi üzv dövlətlərin hökumətlərinə milli stategiyalarını hazırlamaq üçün fikir bildirmələrinə şəraitin yaradılmasıdır.
"Bütün bu aspektlər tərəfimizdən hazırlanan təlimatda dəqiqliklə göstərilib. O, dövlətlərin milli strategiyalarının hazırlanması üzrə fəaliyyət planını nəzərdə tutur", - Qribkov vurğulayıb.
Müəllif hüquqlarına gəldikdə, bu baxımdan Ümumdünya Əqli Mülkiyyət Təşkilatında "Müəllif hüquqları haqqında qanunların adaptasiyası" və "Müəlliflik hüququnun etik xüsusiyyətləri" alətləri var. Onlar region ölkələrində yaranan vəziyyətlə bağlı dəqiq təhlil verir, eləcə də milli normaların beynəlxalq normalara uyğunlaşdırılmasının zəruriliyini qiymətləndirir.
Yaxın vaxtlarda "Müəlliflik hüququ sahəsində, xüsusilə də rəqəmsal onlayn-mühitdə hüququn tətbiqi" adlı müəlliflik hüququnun etik vəzifələri üzrə alətə əlavə başlıqdan da istifadə etmək olacaq. Qribkovun sözlərinə görə, bu başlıqdan artıq yaxın bir neçə ay ərzində istifadə etmək mümkün olacaq.
Bundan başqa, mühüm tərkib hissələrdən biri milli brendin yaradılmasıdır. Bu alət üzərində iş demək olar ki, başa çatıb və ondan tezliklə bütün arzu edənlər istifadə edə biləcəklər. Bu alətin əsas ideyası ölkənin imicinin artırılması, eləcə də milli brendin yaradılmasının əsas metodlarının müəyyənləşdirilməsidir.
Bu il lazımi və mühüm komponentlərdən biri - əqli mülkiyyət sahəsində hüquqların qorunmasından da istifadə mümkün olacaq.
MDB ölkələri üçün xüsusi olaraq "Kiçik və orta innovasiyalı müəssisələrin rolunun artırılması" aləti də hazırlanıb. Onun əsas ideyası səmərəliliyin qiymətləndirilməsi, qabaqcıl təcrübənin müəyyənləşdirilməsi və MDB ölkələri üçün tövsiyələrin hazırlanmasıdır.
"Hazırda biz yeni alətə də keçmişik. O, indi hazırlanır. Bunlar əqli mülkiyyətin iqtisadi aspektləridir və bundan sonra əqli mülkiyyət sahəsində tədrisdir. Bu layihə çərçivəsində regionun müəllimləri üçün veb-portalın yaradılması haqqında çox maraqlı fikir yaranıb. O, institut əməkdaşlarının biri-biri ilə ünsiyyət yaratmasına xidmət edəcək", - Qribkov bildirib.
Portal ali məktəblərə öz prqoramlarını təqdim etməyə, onlar arasında interaktiv ünsiyyətə imkan yaradacaq. Nəticədə əqli mülkiyyət sahəsində müxtəlif dillərdə terminlər lüğətinin yaradılması imkanı meydana çıxacaq. O, bilavasitə əqli mülkiyyət sahəsində peşəkarlar, universitetlərin müəllim və rəhbərləri tərəfindən redaktə ediləcək.
"Daha iki alət - "Ənənəvi biliklər" və "Mədəni irs obyektlərinin rəqəmsal formata köçürülməsi" hazırlanma mərhələsindədir. Biz ümid edirik ki, onlardan artıq gələn ilin əvvəlində istifadə etmək olacaq", - Qribkov əlavə edib.
Ekspertin sözlərinə görə, Ümumdünya Əqli Mülkiyyət Təşkilatı gələcəkdə də keçid iqtisadiyyatı ölkələrinə bu sahədə siyasətin hazırlanmasında, hüquqi islahatların aparılmasında və əqli mülkiyyət sahəsində beynəlxalq standartların bərpasında yardım edəcək.
