Azərbaycan, Bakı, 14 iyun /Trend, müxbir H.Vəliyev/
Dövlət idarələri elektron sənəd dövriyyəsinə keçən zaman informasiya təhlükəsizliyi sistemlərinə daha diqqətlə yanaşmalıdrlar. Bu barədə Trend-ə İnformasiya Texnologiyaları İnstitutunun (İTİ) baş mühəndisi Rəşid Ələkbərov deyib.
Onun sözlərinə görə, rəqəmsal imzanın tətbiqi bu problemi qismən həll edə bilər. Ona əlavə kimi lisenziyalaşdırılmış proqram həlləri ola bilər. Onlar olmadan sistem haker hücumlarına məruz qala bilər.
"Azərbaycan Prezidentinin "Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında" fərmanına uyğun olaraq, elektron xidmətlərə keçid cari ilin sonunadək həyata keçirilməlidir. Bununla əlaqədar səmərəli informasiya müdafiəsi sistemlərinin qurulması məsələləri bu gün xüsusi aktuallıq kəsb edir", - Ələkbərov qeyd edib.
Dövlət başçısının fərmanına əsasən, mərkəzi icra hakimiyyəti orqanlarına üç ay müddətində elektron xidmətin təşkili üçün bütün tədbirlər görmək tapşırılıb. Söhbət elektron xidmətlər göstərilməsi üçün rəsmi internet informasiya ehtiyatlarında xüsusi elektron xidmət bölməsinin yaradılmasından, elektron xidmət bölməsində aidiyyəti üzrə göstərilən xidmətin adının, bu xidmətin göstərilməsi üçün tələb olunan sənədlərin dəqiq siyahısının, müvafiq sənədlərin (ərizə, blank və digər) elektron formasının yerləşdirilməsindən, elektron xidmət bölməsinə müraciət edən şəxslər tərəfindən müəyyən edilmiş qaydada doldurulmuş ərizə və tələb olunan sənədlərin skan edilmiş surətlərinin elektron formada qəbul edilməsindən, elektron formada ödənişin və digər ödənişlərin təmin edilməsindən gedir.
Dövlət başçısı Rabitə və İnformasiya Texnologiyaları Nazirliyinə üç ay müddətində: elektron xidmətin təkmilləşdirilməsi məqsədi ilə dövlət orqanlarının, eləcə də elektron imza xidmətindən istifadə məqsədi ilə müraciət edən hüquqi və fiziki şəxslərin elektron imza ilə təmin edilməsi işini təşkil etmək; dövlət orqanlarının informasiya sistemləri arasında informasiya mübadiləsinin aparılmasının təmin edilməsi məqsədi ilə zəruri tədbirləri həyata keçirmək; dövlət orqanlarının elektron xidmətlərindən "bir pəncərə" prinsipi əsasında istifadənin təşkili məqsədilə "elektron hökumət" portalının yaradılmasını təmin etməyi və s. tapşırıb.