Azərbaycan, Bakı, 8 oktyabr /Trend, müxbir /
2011-ci ildə Azərbaycanın informasiya-komunikasiya bazarının artımı 30-35 faiz səviyyəsində saxlanılacaq. Bu barədə Trend-ə şənbə günü Rabitə və İnformasiya Texnologiyaları Nazirliyini aparatının rəhbəri Vidadi Zeynalov məlumat verib.
"Bu göstərici Azərbaycan bazarına xarakterikdir. Uyğun tendensiya ölkədə son bir neçə il ərzində izlənilir", - Zeynalov bildirib.
İlk yarımilin nəticələri üzrə məlumatlara əsasən, İKT və poçt rabitəsinin gəlirləri 2010-cu ilin analoji dövrü ilə müqayisədə 15,8 faiz qalxaraq 591,8 milyon manat təşkil edib. Azərbaycanda ÜDM-də İKT və poçt rabitəsi sahəsinin ümumi gəlirləri ilk yarımilə əsasən 1,8 faiz, qeyri-neft sahəsinin ÜDM-də İKT və poçt rabitəsinin sahəsi isə 3,8 faiz təşkil edib.
Azərbaycanın İKT və poçt rabitəsi sektorunun 2009-cu illə müqayisədə 2010-cu ildə alınan gəlirləri 31,3 faiz artaraq 1158,9 milyon manat təşkil edib.
Oktyabrın səkkizinə olan rəsmi məzənnə 0,7869 AZN/USD təşkil edir.
