Azərbaycan, Bakı, 5 yanvar /Trend, müxbir H.Vəliyev/
2012-ci ildə Azərbaycan məktəblərinin kompüterləşməsinə təxminən 16 milyon manat xərclənəcək. Bu barədə cümə axşamı Trend-ə Təhsil Nazirliyi yanında Təhsil Sisteminin İnformasiyalaşdırılması İdarəsinin rəisi Samir Məmmədov deyib.
Məmmədovun sözlərinə görə, hazırda nazirlik Bakı və Sumqayıt məktəblərinin kompüter parkının yenilənməsi üzrə işlər aparır.
Bu istiqamətdə işlər martın sonuna qədər başa çatmalıdır.
"Hazırda paytaxtda hər 20 şagirdə 1 kompüter düşür (20/1). Bu göstəricinin dəyişməsi ilin sonuna qədər mümkündür. Ölkənin elə rayonları var ki, orada bu göstərici 15/1 və 25/1 təşkil edir. Bizim əsas vəzifəmiz respublikanın bütün ərazisi üzrə orta göstəriciyə, yəni bu gün paytaxt üçün xarakter olan göstəriciyə nail olmaqdır", - Məmmədov bildirib.
