Azərbaycan, Bakı, 12 aprel /Trend, müxbir H.Vəliyev/
XV Avrasiya İqtisadi Sammiti çərçivəsində ilk dəfə olaraq "dəyirmi masa" təşkil edilib. "Dəyirmi masa"da telekommunikasiya sektorunun inkişaf tendensiyaları müzakirə edilib. Bu barədə cümə axşamı Trend-ə "Bakcell" şirkətinin ictimaiyyətlə əlaqələr şöbəsinin müdiri Süheylə Cəfərova bildirib.
"Bakcell" şirkəti İstanbulda keçirilən sammitin sponsorlarından biridir.
Cəfərovanın sözlərinə görə, "dəyirmi masa" zamanı birbaşa biznesə və yekunda son istifadəçiyə təsir edən telekommunikasiya sahəsinin inkişafı məsələləri nəzərdən keçirilib.
"Bakcell" şirkətinin məsləhət şurasının rəhbəri Cüneyt Türktan "dəyirmi masa"da şirkətin fəaliyyəti haqqında məlumat verib.
Onun sözlərinə görə, "Bakcell" şirkətinin sammitdə iştirakının əsas məqsədi ölkənin telekommunikasiya sektorunun cari vəziyyəti və Azərbaycana investisiyaların cəlb edilməsi haqqında məlumatın təqdim edilməsidir.