Azərbaycan, Bakı, 27 mart /Trend, müxbir H.Vəliyev/
Rusiya poçtu Azərbaycan istiqamətində "Forsaj" beynəlxalq təcili ünvansız pulköçürmə sistemini işə salmağı planlaşdırır. Bu barədə çərşənbə günü Trend-ə "Azərpoçt" MMC-dən bildiriblər.
MMC-dən deyiblər ki, hazırda layihə üzrə danışıqlar aparılır və xidmətin ilin birinci yarısının sonunda işə salınacağı gözlənilir. Bunun üçün sistemin "Azərpoçt"un korporativ informasiya sisteminə inteqrasiyası tələb olunur.
"Forsaj" xidmətində texnoloji tərəfdaş qismində "Coinstar Eurasia Limited" şirkəti çıxış edir.
"Forsaj" Rusiyanın pul köçürmələri bazarında ən çox ehtiyac duyulan məhsullardan biridir. "Forsaj" məhsulu çərçivəsində nağd pul vəsaitinin qəbulu və köçürmənin ödənişi ilə fiziki şəxslər arasında Rusiyadaxili və beynəlxalq pul köçürmələri həyata keçirilir.
"Forsaj" sisteminin əsas üstünlüklərindən biri sürətli pul köçürülməsi, geniş coğrafiyada xidmət göstərilməsi və pul köçürmələrinin həyata keçirilməsinə görə aşağı komissiya haqqının (0,4 faizdən başlayaraq) olmasıdır.
