Azərbaycan, Bakı, 7 noyabr /Trend, müxbir H.Vəliyev/
Oktyabrda Milli Sertifikat Xidmətləri Mərkəzi tərəfindən verilən elektron rəqəmsal imzaların ümumi sayı 2,9 faiz artaraq noyabrın 1-nə 16 415 ədəd təşkil edib. Bu barədə Trend-ə Rabitə və İnformasiya Texnologiyaları Nazirliyinin Məlumat Hesablama Mərkəzindən (MHM) məlumat verilib.
MHM-in məlumatına görə, Azərbaycanda ilin əvvəlindən elektron rəqəmsal imza sahiblərinin sayı 7 dəfədən çox artıb.
Oktyabrda MHM tərəfindən 462 rəqəmsal imza kartı verilib ki, bu da sentyabrda verilmiş elektron rəqəmsal imzaların sayından təqribən 35,9 faiz çoxdur.
Verilən elektron rəqəmli imzaların ümumi sayından dövlət strukturlarının payına 12 156 ədəd düşüb, 657 ədəd hüquqi şəxslərə, 3 602 ədəd isə vətəndaşlara verilib.
Təsdiq edilmiş elektron xidmətlərin sayının (426 ədəd) 272-dən portalda istifadə etmək mümkündür. Dövlət strukturlarının saytlarında yerləşdirilən elektron xidmətlərin ümumi sayı 407 ədəd təşkil edir.