Azərbaycan, Bakı, 16 yanvar /Trend, müxbir H.Vəliyev/
Proqram Təminatı İstehsalçıları Assosiasiyasının (Business Software Alliance - BSA) məlumatına görə, 2013-cü ilin yekunları üzrə Azərbaycanda proqram təminatı (PT) sahəsində piratçılığın səviyyəsi 87 faiz təşkil edib. Bu barədə Trend-ə FINA LLP şirkətinin rəhbəri Nəriman Ramazanov bildirib.
FINA LLP şirkəti 2012-ci ilin dekabrında Azərbaycan bazarında Proqram Təminatı İstehsalçıları Assosiasiyasının avtorizasiyasını alıb.
Onun sözlərinə görə, BSA ekspertlərinin qiymətləndirmələrinə əsasən, 2011-2012-ci illərlə müqayisədə Azərbaycanda pirat proqram təminatı bazarının həcmi dəyişməz qalıb: "Lakin 2014-cü ilin ortalarına doğru PT sahəsində piratçılığın səviyyəsinin 1-1,5 faiz azalacağı proqnozlaşdırılır ki, bu da bir çox dövlət idarələri və respublikanın maliyyə sektoru müəssisələrinin lisenziyalaşdırılmış PT-yə kütləvi keçidi ilə bağlı olacaq".
BSA qiymətləndirmələrinə görə, Azərbaycanda qeyri-leqal şəkildə istiafdə olunan PT bazarının həcmi ildə 60 milyon dolları ötür.
