Azərbaycan, Bakı, 5 avqust /Trend, müxbirlər Təmkin Cəfərov, Hüseyn Vəliyev/
Azərbaycan və İran telekommunikasiya və poçt rabitəsi sahələrində əməkdaşlıq üzrə iki yeni saziş imzalayacaqlar.
Bu məsələ avqustun 5-də Bakıda Azərbaycanın rabitə və yüksək texnologiyalar naziri Əli Abbasov və İranın rabitə və informasiya texnologiyaları naziri Mahmud Vaezi arasında keçirilmiş görüşdə müzakirə olunub.
Əldə edilmiş razılığa əsasən, tərəflər yaxın gələcəkdə göstərilən sənədlərlə möhkəmləndiriləcək əməkdaşlığın hüquqi aspektlərinin müzakirəsinə başlayacaqlar.
Görüşdə hər iki nazir qeyd edib ki, sənədlərin detallarının tərəflərin İranda keçiriləcək qarşıdakı görüşü çərçivəsində müzakirəsi planlaşdırılır. Adıçəkilən sahələrdə əməkdaşlıq üzrə sənədlərin Azərbaycan nümayəndə heyətinin İrana səfəri çərçivəsində imzalanması istisna olunmur.