Azərbaycan, Bakı, 4 sentyabr /Trend, müxbir Hüseyn Vəliyev/
Azərbaycanda elektron ticarətin inkişafı üçün onun gömrük və vergi ödənişlərindən azad edilməsi təklif edilir.
Rabitə və Yüksək Texnologiyalar Nazirliyindən cümə axşamı Trend-ə verilən məlumata görə, nazirlik tərəfindən bu təklif elektron ticarətin inkişafının dəstəklənməsi məqsədi ilə hazırlanır: "Ölkədə pərakəndə elektron ticarətin inkişafı üçün əlverişli şəraitin yaradılması istiqamətində addımlar artıq qanunvericilik səviyyəsində atılıb. Həmçinin gömrük rüsumu ödənilmədən ölkənin hüdudlarından kənarda (elektron ticarət meydançalarının köməyi ilə) alınan malların dəyəri 200 manatdan min manatadək artırıla bilər".
Mənbənin sözlərinə görə, internet vasitəsi ilə iri kommersiya fəaliyyətinə gəldikdə, bu istiqamətdə də vergi və gömrük güzəştlərinin tətbiqi təklif edilir: "Rabitə Nazirliyi bu məsələ ilə bağlı müvafiq dövlət strukturları ilə danışıqlar aparmağa təşəbbüs göstərmək niyyətindədir".
Dövlət Statistika Komitəsinin məlumatına görə, 2013-cü ilin yekunları üzrə, Azərbaycanda elektron ticarət bazarının həcmi 2,6 milyon manat olub ki, bu da 2012-ci ilin göstəricisindən 1,6 dəfə çoxdur. 2014-cü ilin yanvar-iyul aylarında elektron ticarət bazarının həcmi 10,2 faiz artımla 1,5 milyon manat təşkil edib.
