...

Azərbaycan poçt operatoru üçün dotasiyaları 30 faizdən çox artırır

Telekommunikasiya Materials 9 Oktyabr 2014 14:39 (UTC +04:00)

Trend-i buradan izləyin

Azərbaycan, Bakı, 9 oktyabr /Trend, müxbir Hüseyn Vəliyev/

"Azərpoçt" MMC üçün dövlət dotasiyalarının 2015-ci ildə 37 faiz artırılması planlaşdırılır. Trend-in məlumatına görə, bunu rabitə və yüksək texnologiyalar naziri Əli Abbasov poçt rabitəsi işçilərinin peşə bayramına həsr edilmiş mətbuat konfransında deyib.

Onun sözlərinə görə, gələn ilin dövlət büdcəsində poçt operatoru üçün dotasiyaların məbləği 3,7 milyon manat həcmində nəzərdə tutulub. Cari ildə isə bu rəqəm 2,7 milyon manatdır.

Nazir qeyd edib ki, əhaliyə universal poçt xidmətlərinin göstərilməsi üçün poçt operatoruna dotasiyalar təqdim olunur. Universal xidmətlərə yazılı korrespondensiyanın qəbulu, işlənməsi, daşınması və çatdırılması, pul vəsaitlərinin poçt və teleqrafla köçürülməsi və s. aiddir.

Ə.Abbasov bildirib ki, dövlət maliyyələşdirilməsinin məbləği il ərzində göstərilən xidmətlərin həcmindən asılıdır: "Son 3 il ərzində poçt operatorunun gəlirlərinin orta illik artımı təqribən 20 faiz təşkil edir. Cari ilin üç rübünün yekunları üzrə bu göstərici 18 faiz təşkil edib".

Nazirin sözlərinə görə, "Azərpoçt"un gəlirlərinin 35 faizi poçt rabitəsi xidmətlərinin ənənəvi növlərinin, 25 faizi kommunal ödənişlər üzrə yığımlara görə komissiyanın, 25 faizi maliyyə xidmətlərinin, qalan 15 faiz isə digər xidmət növlərinin payına düşür.

Poçt işçilərinin əməkhaqqının artırılması məsələsinə gəlincə, Ə.Abbasov əlavə edib ki, 2015-ci il yanvarın 1-dən onlar üçün ciddi məvacib artımı gözlənilmir. Hazırda "Azərpoçt" MMC-də orta əməkhaqqı 220 manatdır ki, bu da respublika üzrə orta aylıq məvacibdən təqribən 2 dəfə aşağıdır.

Məqalədə:
Xəbər lenti

Xəbər lenti