Azərbaycan, Bakı, 10 oktyabr /Trend, müxbir Hüseyn Vəliyev/
Azərbaycan və İran sərhədyanı ərazilərdə tezlik resurslarının tənzimlənməsi ilə bağlı bütün texniki məsələləri həll ediblər. Trend-in məlumatına görə, bunu cümə günü jurnalistlərə Bakıda səfərdə olan İran Radio və Televiziya Təşkilatının sədri İzzətullah Zərqami deyib.
Onun sözlərinə görə, daha əvvəl baş vermiş efir məkanına müdaxilələrlə bağlı bütün problemlər həll olunub: "Hazırda iki ölkə televiziya və radio yayımı sahəsində qarşılıqlı əməkdaşlıq məsələlərini nəzərdən keçirirlər və bu məqsədlə Azərbaycan və İran KİV üzrə komitənin yaradılması təşəbbüsü ilə çıxış ediblər".
İran nümayəndə heyəti ilə görüşdən sonra Azərbaycanın rabitə və yüksək texnologiyalar naziri Əli Abbasov jurnalistlərə deyib ki, KİV üzrə Azərbaycan-İran birgə komissiyasının yaradılmasında əsas məqsəd internet televiziyası, ənənəvi teleradioyayım, rəqəmsal və peyk yayımı sahələrində əməkdaşlığın qurulmasıdır: "Qarşılıqlı maraqlara riayət olunması da İranla əməkdaşlığın vacib aspektlərindən biridir".
