Azərbaycanın Rabitə və İnformasiya Texnologiyaları Nazirliyi yeni portal üzərində işləri başa çatdırıb. Rabitə Nazirliyinin informasiya cəmiyyətinin inkişafı şöbəsinin müdiri Rüfət Gülməmmədovun Trend ə verdiyi xəbərə görə, portalın artıq bütün versiyaları - Azərbaycan, ingilis və rus versiyası hazırdır. "Bu, Azərbaycanın rabitə sahəsi haqqında geniş informasiyanın olduğu portal olacaq. Hər dildə materialların həcmi 3500 səhifə təşkil edir", - deyə şöbənin başçısı qeyd edib.
Həmçinin nazirliyin nümayəndəsi bildirib ki, hazırda yeni portalın tətbiqi üzrə texniki işlər görülür.
Yeni portalda Azərbaycanda rabitə və informasiya texnologiyaları sahəsinin indiki vəziyyəti, xidmətlər, ölkədə İT sahəsinin tarixi, layihələr, bu sahədə beynəlxalq münasibətlər və əməkdaşlıq, qanunvericilik bazası və s. haqqında informasiya olacaq. Portalda həmçinin istifadəçilərə xidmət göstərilməsi üzrə xüsusi bölmə olacaq. Abunəçilər burada onları maraqlandıran məsələlər, internet xidmətləri, şəhərlərarası və beynəlxalq rabitə, poçt və digər rabitə xidmətləri haqqında məlumat əldə edə bilərlər.
Həmçinin portalda yerli özəl şirkətlərin, birgə müəssisələrin, bir sıra beynəlxalq təşkilatların İT sahəsi, təhsil müəssisələri və s. haqqında da məlumat var.
İstifadəçiləri çaşdırmamaq üçün yeni portalın da ünvanı əvvəlki kimi olacaq: www.mincom.gov.az.
