Azərbaycanın Rabitə və İnformasiya Texnologiyaları Nazirliyi İT sahəsində "Əməkdaşlıq haqqında" sazişlərin layihələrini hazırlayıb. Dövlət strukturundan Trend ə verilən məlumata görə, artıq Azərbaycanın Rabitə Nazirliyi ilə Bolqarıstanın Rabitə və Nəqliyyat Nazirliyi arasında informasiya texnologiyaları, poçt və telekommunikasiya sahəsində "Əməkdaşlıq haqqında", Azərbaycan və Latviya hökumətləri arasında "Əməkdaşlıq haqqında", Macarıstanın İnformasiya və Kommunikasiya Nazirliyi ilə İKT sahəsində "Əməkdaşlıq haqqında", Azərbaycan və Finlandiya hökumətləri arasında rabitə və İT sahəsində "Əməkdaşlıq haqqında", İsveç krallığı, İspaniya, Ltiva hökuməti, Sloveniya və Xorvatiya ilə analoji sazişlərin layihələri hazırlanıb və razılaşdırılmaq üçün göndərilib.
Analoji sənədlər Asiya ölkələri ilə də hazırlanıb. Bura Çin Xalq Respublikası, Malayziya, İndoneziya, Hindistan, Yaponiya ilə rabitə və İT sahəsində əməkdaşlığa dair sazişlər, Koreyanın KİPA (Korean IT Industry Promotion Agency) agentliyi ilə elektron hökumət sahəsində qarşılıqlı anlaşma haqqında memorandum daxildir. Bu sənəd ABŞ-ın Ticarət Departamenti, sazişlər Kanada hökuməti və Rusiya Federasiyası ilə də imzalanıb.