2006-cı ilin yanvar-sentyabr aylarında Naxçıvan Muxtar Respublikasında (NMR) müəssisələrə, təşkilatlara və əhaliyə rabitə sahəsində 1867,9 min manat məbləğində xidmət göstərilib ki, bu da 2005-ci ilin analoji dövrü ilə müqayisədə 14% çoxdur.
Bu barədə Trend ə Naxçıvan MR-in Bakıdakı daimi nümayəndəliyindən məlumat verilib.
NMR-in Rabitə və İnformasiya Texnologiyaları Nazirliyi 2699 telefon xətti çəkib.
Göstərilən dövr ərzində Muxtar Respublikanın rabitə müəssisələrində işçilərin sayı 814 nəfər təşkil edib. Bu, 2005-ci ilə olan göstəricidən 4,8% çoxdur.
Bundan başqa, NMR-də rabitənin Trans-Asiya-Avropa (TAE) fibrooptik magistralına qoşulması prosesi həyata keçirilib. İki şəbəkə - Bakı və Naxçıvan arasında STMİ səviyyəli tranzit şəbəkə və Muxtar Respublika ərazisində magistral üzrə SDH şəbəkəsi istismara verilib. Birinci şəbəkə müxtəlif video-konfransların, videtelefonların və s.-nin yaradılması üçün kifayət qədər ehtiyata malikdir. İkinci şəbəkə isə əvvəllər radiolinklər vasitəsilə işləyən Babək, Culfa, Nehrəm, Əbrəqunus, Gülüstan mərkəzi ATS-ni əhatə edir. Həmçinin, CDMA texnologiya xidmətləri və Bakcell mobil rabitəsi tətbiq olunub.
