Trend in xəbər verdiyi kimi, Azərbaycan "İnkişaf məqsədilə İnterneti idarəetmə" forumunun ilk görüşündə iştirak edir. Afinada keçirilən görüş bu gün öz işini başa vurur. Forumda Azərbaycandan 3 nəfərdən - "Milli elektron idarəetmə şəbəkəsi təşəbbüsü" layihəsinin direktoru İlyas Naibov-Əylisli, AzNet layihəsinin rəhbəri Murad Maqsudov və UN DP nümayəndəsi Elnur Xəlilovdan ibarət nümayəndə heyəti iştirak edir.
Forumun yaradılması haqqında qərar 2005-ci ilin noyabrında Tunisdə informasiya cəmiyyəti məsələləri üzrə Ümumdünya görüşündə (World Summit on Information Society) qəbul olunub. Qlobal şəbəkənin inkişaf siyasəti məsələləri üzrə çoxtərəfli dialoqu təmin etmək üçün baş katibə forumun çağırılması tapşırılıb.
Birinci görüşdə hökumət, özəl sektor və vətəndaş cəmiyyətinin mindən çox nümayəndəsi iştirak edir. Onlar dünya xalqlarının maraqlarına uyğun olaraq, internetin potensialından yaxşı istifadə ilə bağlı təcrübə, informasiya və ideya mübadiləsi aparır. 8 əsas sessiya zamanı əsas əhəmiyyət İnternetə çıxış məsələlərinə, təhlükəsizlik problemlərinə, internetin açıqlığına, onun səhifələrində fikrin sərbəst ifadə imkanlarına, o cümlədən yeni kommunikasiya vasitələrinin müxtəlifliyinə və s. verilir.
BMT baş katibi mart ayında Cenevrədə kiçik katiblik təsis edib. Məqsəd İnternetdən istifadəni İdarəetmə Forumunun fəaliyyətinin təşkilinə yardım etməkdən ibarət olub. Buna qədər 2006-cı ilin fevralında Cenevrədə aparılmış məsləhətləşmələrdə Forumun iş metodları və formatı müzakirə olunub. Məsləhətləşmələr zamanı forumun açıq və hərtəfli olacağı ilə bağlı razılaşma əldə olunub. Forumda interneti idarəetmə məsələlərində bütün səlahiyyətli və maraqlı şəxslər iştirak edə biləcək.
