Azərbaycanın mobil operatoru Bakcell Ltd. yaxın üç ayda Naxçıvanda baza stansiyalarının sayını iki dəfə artıracaq. Trend şirkətə istinadən xəbər verir ki, beləliklə, Muxtar respublikanın bütün ərazisi Bakcell operatorunun rabitə xidmətləri ilə əhatə olunacaq.
Yaxın 6 ay ərzində satış və diler məntəqələrinin sayı 2 dəfə artırılacaq. Sonrakı mərhələdə yeni servis mərkəzləri Gəncə, Sumqayıtda, sonra Şəki və Zaqatalada, və nəhayət Lənkəran-Astara zonasında açılacaq.
Qeyd edək ki, bu yaxınlarda şirkət Naxçıvanda ilk regional servis mərkəzini açaraq, muxtariyyət ərazisində maliyyə fəaliyyətinin başlandığını bildirib.
Bakcell 1994-cü ildə Azərbaycan Rabitə Nazirliyi ilə əməkdaşlıqda birgə müəssisə kimi yaradılıb. Elə həmin il Bakcell analoq rabitə xidməti göstərən şirkət kimi fəaliyyətə başlayıb, 1998-ci ilin dekabr ayından isə o, GSM texnologiyasını tətbiq etməyə başlayıb. 2003-cü ilin dekabr ayında özəlləşdirmə prosesi başa çatıb və nəticədə 2004-cü ilin yanvar ayından etibarən Bakcell tamamilə özəlləşdirilmiş şirkət kimi fəaliyyət göstərir. Hazırda şirkət bütün ölkə üzrə 700 mindən artıq abunçiyə xidmət göstərir.
