Azərbaycan,Bakı/müxbir Trend S.Babayeva/ Azərbaycan Milli Bankının (AMB) texniki dəstəyi ilə Dünya Bankı (DB) ilə birgə layihə çərçivəsində maliyyə xidmətlərinin göstərilməsi istiqamətində "Azərpoçt" DM üçün yeni hesabların plan layihəsi hazırlanıb. Bu barədə müəssisənin baş direktor müavini Nazim Süleymanov məlumat verib.
Onun sözlərinə görə, Maliyyə Nazirliyi layihəni nəzərdən keçirib və təsdiqləyib.
"Azərpoçt"un baş ofisində şəbəkə otağı yerləşdirilib, dövlət müəssisəsinin yeni fəaliyyət strategiyası hazırlanıb. Layihə üzrə nəzərdə tutulmuş işlərin effektliyini artırmaq üçün rəhbər komitə yaradılıb.
DM-in infrastrukturunun avtomatlaşdırılması üçün paytaxt, şəhər və ölkə regionlarının poçt filialları üçün 450 kömpüter və printer ayrılıb.
17,5 mln. dollarlıq "Maliyyə xidmətlərinin inkişafı" layihəsi Azərbaycanın poçt şəbəkəsinin müasirləşdirilməsinə istiqamətləndirilib. 12,25 mln. dollar DB təqdim edir, qalan hissə Azərbaycan hökuməti - Rabitə Nazirliyi və Azərbaycan Milli Bankının payına düşür. Rabitə Nazirliyində hesab edirlər ki, pilot layihə kimi ilin sonuna qədər maliyyə xidmətlərini ilkin olaraq Bakı, Sumqayıt və Abşeron yarımadasında tətbiq etmək mümkün olacaq.
