Azərbaycan, Bakı/ Trend müx.S.Babayeva/ Azərbaycanda yerli telefonlara danışıq məhdudiyyətlərinin qoyulması məsələsi yenidən qaldırıla bilər. Çərşənbə günü Baktelekom İB-nin baş direktoru Beytulla Hüseynovun verdiyi məlumata görə, Bakıda və regionlarda rabitə şəbəkəsinin bərpasından sonra bu məsələ yenidən müzakirə oluna bilər.
Onun sözlərinə görə, artıq bir neçə tarif paketi hazırlanıb.
Paketlər bütün təbəqələrdən olan abonentləri, biznes strukturlarını, aztəminatlı təbəqələri də nəzərə almaqla hazırlanıb.
"Məhdudiyyətlərin qoyulması sadəcə vaxt məsələsidir. Bu, bir çox ölkələrdə tətbiq edilir" - deyə təşkilat rəhbəri bildirib.
İyun ayının 1-dən Azərbaycanda telefon danşıqlarının yeni tarifi qüvvəyə minəcək.
Ölkə ərazisində aylıq abonent haqqı 0,7 manatdan 2 manata qaldırılıb.
Əvəzində isə ölkə daxilində beynəlxalq danışıq tarifləri 0,09 manatdan 0,07 manata endirilib:
-MDB və Baltik ölkələrinə olan tariflər 0,45 manatdan 0,36 manata;
-İran, Türkiyə, Pakistana olan tariflər 0,54 manatdan 0,45 manata;
-Avropa ölkələrinə olan tariflər 0,72 manatdan 0, 54 manata;
-ABŞ və digər ölkələrə olan tariflər 0,9 manatdan 0,54 manata qədər endirilib.
Hazırda Azərbaycanda hər stasionar telefonun dəyəri 3 manat həcmində qiymətləndirilir.
