Azərbaycan, Bakı/ Trend müxbir S.Babayeva / Azərbaycan Elmlər Akademiyasının İnformasiya Texnologiyaları Institutu radioteleviziya stansiyaları üçün Rabitə və İnformasiya Texnologiyaları Nazirliyinin "Geography Information System" (GIS) texnologiyası əsasında hazırladığı yeni layihələndirilmiş anten-fider qurğusunu təqdim edib.
Yeni sistem özündə proqram təminatını da nəzərdə tutur. Anten-fider qurğusu və teleradio ötürücülərdən istifadə sistemi SR-4 proqram təminatı ilə Azərbaycanın rəqəmli relyef xəritəsi nəzərə alınmaqla yayım zonalarını modelləşdirir və vizuallaşdırır.
İnstitutda hesab edirlər ki, bu sistemin tətbiqi radioteleviziya ötürücülərinin optimal yerdə quraşdırılmasını müəyyənləşdirir. Bu sistemin köməyi ilə arzuolunmaz kanalların Azərbaycan televiziya yayım məkanına daxil olmasının qarşısını almaq olar.
Təqdimatda çıxış edən rabitə naziri Əli Abbasov bildirib ki, yeni sistemin tətbiq olunması ilə respublika sərhədlərini keçən kanalın siqnalının ötürüldüyü tezliyi müəyyənləşdirmək və beynəlxalq hüquq normaları çərçivəsində tədbirlər görmək mümkün olacaq.
