Bakı. Trend:
Türkiyə parlamenti çərşənbə axşamı, yanvarın 23-də İsveçin NATO-ya daxil olması ilə bağlı səsvermə keçirə bilər.
Trend xəbər verir ki, bu barədə CNN Türk məlumat yayıb.
Telekanalın məlumatına görə, İsveçin NATO-ya daxil olması ilə bağlı protokol parlamentin gündəliyinə daxil ediləcək. Parlament müzakirələrindən sonra İsveçin NATO-ya üzvlüyünü nəzərdə tutan protokolun səsverməyə çıxarılacağı gözlənilir.
Bundan əvvəl NATO-nun baş katibi Yens Stoltenberq Türkiyə və Macarıstanın İsveçin alyansa daxil olmasını tezliklə ratifikasiya edəcəyinə ümid etdiyini bildirib. Onun sözlərinə görə, Stokholmun üzv olması NATO-nu daha da gücləndirəcək.
Rusiya və Ukrayna arasında hərbi münaqişənin başlanması fonunda İsveç və Finlandiya 2022-ci ildə NATO-ya üzv olmaq üçün müraciət edib. Helsinki 2023-cü ilin aprelində rəsmi olaraq bloka üzv olub. İsveç Türkiyə ilə fikir ayrılıqları da daxil olmaqla, hələ də alyansa qoşulmayıb.