Bakı. Trend:
İngiltərə kralı III Çarlz ölkənin keçmiş milli komanda baş məşqçisi Qaret Sautqeyt, məşhur aktyor Stiven Fray və London meri Sadiq Xan da daxil olmaqla bir çox şəxsi cəngavər rütbəsi ilə təltif edib.
Trend xəbər verir ki, bu təltiflər Britaniya hökuməti tərəfindən Yeni il ərəfəsində təqdim olunan ənənəvi mükafat siyahısında yer alıb. Bu il siyahıya ümumilikdə 1200 nəfər daxil edilib.
Bundan əlavə, yapon əsilli britaniyalı yazıçı və 2017-ci ilin Ədəbiyyat üzrə Nobel Mükafatı laureatı Kazuo İşiquro ədəbiyyata müstəsna xidmətlərinə görə “Şərəf Cəngavəri” ordeni ilə təltif olunub.
Mükafat alanlar arasında aktyorlar, teleaparıcılar, tibb işçiləri, hüquqşünaslar və hüquq müdafiə təşkilatlarının nümayəndələri də yer alıb.
Ənənəyə uyğun olaraq, dövlət mükafatlarına layiq görülənlərin siyahısı hər il iki dəfə - Yeni il qabağı və iyun ayında dərc edilir.