Bakı. Trend:
Britaniyanın Ədliyyə Nazirliyi “əhəmiyyətli” kiberhücuma məruz qalıb. Hücum nəticəsində 2010-cu ildən etibarən nazirliyə ərizə ilə müraciət etmiş yüz minlərlə Britaniya sakinin şəxsi məlumatları oğurlanıb.
Trend xəbər verir ki, bu barədə ölkənin yerli KİV-ləri məlumat yayıb.
Məlumata görə, hakerlərin ələ keçirdiyi məlumatlara ərizəçilərin əlaqə nömrələri, ünvanları, doğum tarixləri, fərdi identifikasiya nömrələri, məhkumluqla bağlı məlumatları, məşğulluq statusu və kreditlər üzrə maliyyə məlumatları daxil ola bilər.
Hakerlər isə artıq 2,1 milyon sətrlik məlumat bazasına sahibləndiklərini iddia ediblər. Bu rəqəm hələ ki, rəsmi qurumlar tərəfindən təsdiqlənməyib.