...

“Qisas almadan ölmə...” filmi İsraildə nümayiş olunacaq

Mədəniyyət Materials 13 İyul 2015 13:02 (UTC +04:00)
Xalq artisti, kinorejissor Oqtay Mir-Qasımın “Qisas almadan ölmə. Keçmişdən məktublar” bədii filmi “İsrail-Azərbaycan” Beynəlxalq Assosiasiyasının təşəbbüsü ilə avqustun 18-də Tel-Əviv şəhərində nümayiş olunacaq.
“Qisas almadan ölmə...” filmi İsraildə nümayiş olunacaq

Azərbaycan, Bakı, 13 iyul /Trend, müxbir İlhamə İsabalayeva/

Xalq artisti, kinorejissor Oqtay Mir-Qasımın "Qisas almadan ölmə. Keçmişdən məktublar" bədii filmi "İsrail-Azərbaycan" Beynəlxalq Assosiasiyasının təşəbbüsü ilə avqustun 18-də Tel-Əviv şəhərində nümayiş olunacaq.

Mədəniyyət və Turizm Nazirliyindən Trend-ə verilən məlumata görə, nümayişdə iştirak etmək üçün rejissor İsrailə səfər edəcək.

Nazirliyin sifarişi ilə "Azərbaycanfilm" kinostudiyasında lentə alınan ekran əsərinin premyerası 2014-cü ilin fevralında keçirilib. Film XIX əsrin əvvəllərindən ölkəmizdə məskən salmış almanların 1941-ci ildə Orta Asiyaya deportasiya olunmasından bəhs edir. 1819-cu ildə Vürtemberq krallığından (Almaniyanın indiki Baden-Vürtemberq əyaləti) gələn almanlar Azərbaycanın qərbində, Gəncə yaxınlığında ilk koloniyanın - Helenendorf qəsəbəsinin (indiki Göygöl şəhəri) əsasını qoyurlar. Bir neçə nəsil dəyişir, almanlar yerli əhali ilə qaynayıb-qarışırlar. 1941-ci ildə Azərbaycanda yaşayan 20 minə yaxın alman Stalinin əmri ilə sürgün edilir.

Kinolentdə o dövrün hadisələri ilə yanaşı, müasir zaman da təsvir edilir. Çəkilişlər Bakıda, Göygöl rayonunda, Tbilisidə və Gürcüstanın Yuxarı Svanetiya bölgəsinin dağ kəndlərində, Almaniyanın Bukof şəhərində aparılıb.

Filmin ssenari müəllifi Oqtay Mir-Qasım, quruluşçu operatoru Nikolay İvasiv (Rusiya), quruluşçu rəssamı Vaja Calaqaniya (Gürcüstan), bəstəkarı Elmar Feldir (İsrail). Rollarda Ramiz Əzizbəyli, Ayan Mir-Qasım, Qurban İsmayılov, Bəxtiyar Xanızadə, almaniyalı aktyorlar Ulrix Rexenbax, Yekaterina Şmidt, gürcü aktyorlar Gia Caparidze, Levan Boçorişvili və başqaları çəkiliblər.

Məqalədə:
Xəbər lenti

Xəbər lenti