Bakı. Trend:
M.Maqomayev adına Azərbaycan Dövlət Akademik Filarmoniyasında fevralın 2-də “Gənclər günü” münasibətilə təltifetmə mərasimi keçirilib.
Trend xəbər verir ki, filarmoniya rəhbərliyinin nümayəndələri gənclik bayramı münasibətilə yaradıcı nəsillə görüş təşkil ediblər.
M.Maqomayev adına Azərbaycan Dövlət Akademik Filarmoniyasının direktor müavini, sənətşünaslıq üzrə fəlsəfə doktoru Ayla Kərimova-Zəkəriyyə bütün Azərbaycan gənclərini təbrik edərək Filarmoniyada fəaliyyət göstərən hər bir gəncə göstərilən xüsusi diqqəti vurğulayıb.
M.Maqomayev adına Azərbaycan Dövlət Akademik Filarmoniyasının direktoru, Xalq artisti, professor Murad Adıgözəlzadənin təşəbbüsü ilə hər kollektivdən gənc, istedadlı və ən fəal nümayəndələr seçilərək, yaradıcı fəaliyyətinə görə təşəkkürnamə ilə təltif olunublar.
Təltif olunanların sırasında Rifan Qəhrəmanov, İlkanə Cəfərova, Şərif Bağırov, Nəzrin Aslanlı, Nurlana Abdullayeva, Rüfət Xəlilov, Firdovsi Eyvazov və Camalə Abdinzadənin adını çəkmək olar.
