Azərbaycan, Lənkəran, 14 dekabr / Trend , muxbir P.Əliyeva/
Güclü külək Azərbaycanın cənubunda yerləşən Lerik (paytaxt Bakıdan 300 kilometr aralıda) rayonunun elektrik təsərrüfatını iflic vəziyyətə salıb. Ötən gün axşam saatlarında ölkənin bölgəsində müşahidə olunan qeyri-sabit hava şəraiti bölgənin ucqar dağ rayonu olan Lerikə ciddi ziyan vurub. Bu barədə bazar ertəsi jurnalistlərə Lerik rayon Fövqəladə Hallar Komissiyasının sədri Habil Məlikov məlumat verib.
Onun bildirdiyinə görə, dünən axşamdan başlayan güclü cənub-qərb küləyi indiyədək davam edir. 100-dən artıq elektrik dirəyinin aşması, 3 min metrdən çox naqilin qırılıması, hər biri 35 min kilovoltluq Masllı Telavar-Lerik və Lənkəran-Hamarat-Lerik yüksək gərginlikli hava hava xətlərində baş vermiş qəza rayonun elektrik təchizatını iflic vəziyyətə salıb. Külək nəticəsində rayon mərkəzindəki bəzi inzibati binaların və yaşayış evlərinin dam örtüyünə ciddi ziyan dəyib. 162 yaşayış məntəqəsi tamamilə işıqsız qalıb.
Komissiya sədri bldirib ki, hazırda rayonun paylayıcı elektrik şəbəkəsinin əməkdaşları qəza yerlərində təmir işləri aparır. Güclü küləyin intensivliyi onların işləməsinə bir qədər maneçilik törədir.
Məlikov Şirvan Yüksək Gərginlikli Elektrik Şəbəkəsi tərəfindən rayona 10 elektrik dayağı göndərdiyini, hazırda rayona dəymiş ziyanın miqdarının hesablandığını bildirib.
Lənkəran regional hidrometrologiya müəssisəsindən verilən məlumata görə, Lerikdə gecə küləyin sürəti normadan artıq, yəni saniyədə 22-25 metr olub.
Məqalə müəllifi ilə əlaqə ünvanı: [email protected]