...

Türkiyədə parlament seçkilərinin nəticələrini əvvəlcədən söyləmək olmaz - deputat

Hadisə Materials 9 İyun 2011 17:04 (UTC +04:00)

Azərbaycan, Bakı, 9 iyun /Trend, müxbir A.Tağıyeva/

Türkiyədə seçkiqabağı vəziyyət çox gərgindir və müxalifətin qələbəyə artmaqda olan imkanlarını və hakim partiyanın əhali arasında reytinqinin azalmasını nəzərə alaraq, seçkilərin nəticələrini əvvəlcədən söyləmək çox çətindir. Bunu Türkiyə Böyük Millət Məclisinin müxalif Cümhuriyyət Xalq Partiyasından olan deputatı Atilla Emek deyib.

"Seçkilərin nəticələri gözlənilməz ola bilər", - Trend-ə Antalyadan telefonla Emek bildirib.

Deputatın fikrincə, bu seçkilərdə Cümhuriyyət Xalq Partiyasının qələbə qazanmaq imkanları artıb və Türkiyə hökumətinə bu partiyanın başçılıq edəcəyi mümkündür.

Emek onu da bildirib ki, hakim Ədalət və İnkişaf Partiyası (AKP) idarəçiliyinin doqquz ili ərzində nə daxili, nə də xarici siyasətdə müsbət nəticələr əldə edib.

Türkiyədə parlament seçkiləri iyunun 12-nə nəzərdə tutulub. Ərdoğanın partiyası Türkiyədə 2002-ci ilin noyabrından hakimiyyətdədir. 2007-ci ilin iyununda keçirilən son parlament seçkilərində o, seçicilərin 47 faiz səsini toplayıb və təkpartiyalı hökumət formalaşdırıb.

Deputatın fikrincə, Türkiyənin hakim partiyası Qafqaz və müsəlman dövlətləri ilə münasibətlərin inkişafına daha çox diqqət yetirməlidir.

"Xarici siyasətdə AKP Qərblə münasibətlərin möhkəmləndirilməsinə böyük diqqət yetirib. Yeni hökumət Qafqaz və türk dövlətləri ilə yaxınlaşmağa çalışmalıdır", - o bildirib.

Emekin sözlərinə görə, türk ölkələrində mövcud problemlər Türkiyəyə də aiddir, buna görə də Ankara hakimiyyəti bu ölkələrdə problemlərin həlli üçün əllindən gələni etməlidir.

"Yeni hökumətin xarici siyasətinin başlıca məqsədi region ölkələri ilə əməkdaşlıq və mövcud problemlərin birgə həlli olmalıdır", - deputat qeyd edib.

Xəbər lenti

Xəbər lenti