Azərbaycan, Bakı, 1 noyabr /Trend, müxbir K.Zərbalıyeva/
Bakıda oğurluq edən şəxslər saxlanılıb.
Bakı şəhər Baş Polis İdarəsindən çərşənbə axşamı Trend-ə verilən məlumata görə, sentyabrın 14-də Xudu Məmmədov küçəsində yaşayan Teymuraz Ələkbərovun mənzilindən pəncərədən keçmə yolu ilə 6000 manat, 8500 ABŞ dolları və 1700 manat dəyərində qızıl-zinət əşyaları oğurlanıb.
Xətai rayon Polis İdarəsinin və 36-cı polis bölməsinin əməkdaşlarının keçirdiyi əməliyyat tədbirləri nəticəsində oğurluqda şübhəli bilinən Bakı şəhər sakini Samir Soltanov oktyabrın 31-də tutulub.
Oktyabrın 19-na keçən gecə Zahid Xəlilov küçəsində yerləşən Bakı şəhər sakini Ramin Məmmədova məxsus mağazadan qapını sındırma yolu ilə 1000 manat və danışıq kartları oğurlanıb.
Yasamal rayon Polis İdarəsinin 29-cu polis bölməsinin əməkdaşlarının keçirdiyi əməliyyat tədbirləri nəticəsində oğurluqda şübhəli bilinən Göyçay rayon sakini Ağamusa Məsimov və Cəlilabad rayon sakini Nahid Bağırov oktyabrın 31-də tutulublar.
Hər iki fakt üzrə cinayət işi başlanıb.