Azərbaycan, Bakı, 3 aprel / Trend, müxbir S.Ağayeva /
Moskvadakı Kaçalov bazarındakı yanğının qurbanları arasında Azərbaycan vətəndaşları yoxdur. Bu barədə çərşənbə axşamı Trend-ə Moskva Fövqəladə Hallar İdarəsindən məlumat verilib.
"Həlak olan 12 nəfərin hamısı Tacikistan vətəndaşlarıdır", - İdarədən deyilib.
Çərşənbə axşamı səhər Moskva bazarında baş vermiş yanğının qurbanlarının sayı 12 nəfərədək artıb. Xəbəri RİA Novosti yayıb.
Yanğın səhər saat 04:50-yə yaxın Varşava şossesi, 166 ünvanda yerləşən Kaçalov bazarında baş verib. Alov anqarda yaranıb, daha sonra ona bitişik yaşayış tikilisinə keçib.
"Saat 07:00-a olan vəziyyətə görə, həlak olan 12 nəfərin cəsədi aşkarlanıb", - agentliyin müsahibi bildirib.
Bundan əvvəl 9 nəfərin öldüyü bildirilmişdi.
Yanğın 2 saat ərzində söndürülüb. Onun sahəsi 50 kvadrat metri əhatə edib. Hadisə yerində səkkiz yanğınsöndürmə briqadası çalışır.