Azərbaycan, Bakı, 20 iyul /Trend, müxbir İ.İzzət/
Şəmkir rayonunda baş verən yol-nəqliyyat hadisəsi ölümlə nəticələnib.
Trend Daxili İşlər Nazirliyinin rəsmi saytına istinadən xəbər verir ki, iyulun 19-da saat 21:30 radələrində Şəmkir rayonu Əliyaqublu kəndinin ərazisində kənd sakini Tural Kazımovun idarə etdiyi "VAZ-2107" markalı və Gəncə şəhər sakini Xəyal Əliyevin idarə etdiyi "Mercedes" markalı avtomaşınlar toqquşub.
Nəticədə xəsarət almış Tural Kazımov və sərnişini, Əliyaqublu kənd sakini Ülvi Kərimov xəstəxanaya yerləşdiriliblər. Lakin Ülvi Kərimovun həyatını xilas etmək mümkün olmadığından sonuncu xəstəxanada ölüb.
Hadisə ilə əlaqədar Baş Dövlət Yol Polisi İdarəsi tərəfindən araşdırma aparılır.