Azərbaycan, Bakı, 21 iyul /Trend/
Trend Kanal S-ə istinadən məlumat verir ki, Yevlax-Zaqatala-Gürcüstan magistral yolunun 130 km-də Zaqatalanın Masex kəndi ərazisində yol qəza hadisəsi qeydə alınıb. Belə ki, Qax rayon Zəyəm kənd sakini Abdurrəhmanov Malik Camal oğlunun idarə etdiyi "Mersedes" markalı avtomobil yol kənarındakı ağaca çırpılıb.
Nəticədə avtomobilin sürücüsü və avtomobildə olan sərnişinlər, Qaxın Zəyəm kənd sakini Şamilov Ramil Rəsul oğlu, Lələpaşa kənd sakini Şirinov Ağakişi Ehtibar oğlu, Turaclı kənd sakini Babayev Adil Nadir oğlu müxtəlif dərəcəli bədən xəsarətləri alıblar. Avtomobildə olan
digər sərnişin Qaxın Zəyəm kənd sakini Abdurrahmanov Camal Şirin oğlu isə elə hadisə yerindəcə dünyasını dəyişib. Xəsarət alanlar dərhal Zaqatala Mərkəzi rayon Xəstəxanasına yerləşdiriliblər. İlkin məlumatlara görə, xəsarət alanlardan ikisinin vəziyyəti ağır hesab
edilir.
Qəzanın ilkin olaraq yüksək sürət və idarəetmənin itirilməsi səbəbindən baş verdiyi ehtimal edilir. Faktla əlaqədar Baş Dövlət Yol Polisi İdarəsinin istintaq və təhqiqat bölməsində araşdırmalar aparılır. Qəzanın dəqiq səbəbləri aparılacaq araşdırmalardan sonra bəlli olacaq.