Bakı. Samir Əli - Trend:
Bu gün Bakı Ağır Cinayətlər Məhkəməsində oğurluqda təqsirləndirilən Rauf Nəbiyevin cinayət işi üzrə məhkəmə prosesi başa çatıb.
Trend-in məlumatına görə, hakim Azər Paşayevin sədrliyi ilə keçirilən prosesdə təqsirləndirilən şəxsə hökm oxunub.
Məhkəmənin hökmü ilə R.Nəbiyev 5 il azadlıqdan məhrum edilib.
İttihama görə, ötən il Sumqayıt şəhəri ərazisində yerləşən "Sumqayıt Texnologiyalar Parkı" MMC-nin mühasib otağından 450 min manat oğurlanıb. Hadisəni Sumqayıt şəhər sakini R.Nəbiyevin törətməsi müəyyənləşib və o, görülən zəruri tədbirlər nəticəsində saxlanılıb.
Saxlanılan şəxs MMC-də təhlükəsizlik üzrə növbə rəisi işləyib. R.Nəbiyevin seyfdən oğurladığı pulun böyük hissəsi onun yaşadığı evdən aşkar olunaraq maddi sübut kimi götürülüb və müvafiq protokol tərtib edilərək MMC-yə qaytarılıb.