Azərbaycan, Bakı / Trend müxbir E.Hüseynli/ İyunun 18-nə keçən gecə Nəsimi rayonu ərazisində tikinti işləri aparılan çoxmərtəbəli binada yanğın baş verib. Bu barədə bazar ertəsi "Xalq jurnalisti" layihəsi çərçivəsində daxil olan məlumata görə, tikilidə yanğın gecə 00.14-də başlayıb.
Fövqəladə Hallar Nazirliyinin (FHN) Nəsimi Yanğından Mühafizə Şöbəsindən bazar ertəsi bildiriblər ki, rayonun Feyzulla Qasımzadə küçəsi, 21 ünvanında çoxmərtəbəli tikilinin 8-9-cu mərtəbələrində yanğın olub. Yanğın nəticəsində 4600 kvadratmetr sahədə taxta qəliblər yanıb. Yanğının söndürülməsi zamanı xəsarət alan olmayıb. Faktla bağlı araşdırma aparılır.
