Azərbaycan, Bakı / Trend müxbir K.Zərbalıyeva/ Cümə günü axşam saat 23.30 radələrində Sabunçu rayonu ərazisində ağır yol qəzası baş verib. Sabunçu Rayon Prokurorluğundan verilən məlumata görə, Pirşağıya gedən yolda, Samur-Abşeron kanalının üstündə iki "VAZ 2107" markalı avtomobil toqquşub. Qəza nəticəsində 8 nəfər həlak olub, 1 nəfər isə kəllə-beyin travması, sol bazu sümüyünün sınığı diaqnozu ilə xəstəxanaya aparılıb.
Qəza nəticəsində avtomobillər tanınmaz hala düşüb. Toqquşma nəticəsində meyidlərdən ikisi kanala düşüb. Kanala düşən meyidlər kanalın aşağı axarından çıxarılıb. Avtomobillərdən biri Pirşağı bağlarından şəhər istiqamətinə, digəri isə toydan Pirşağıya gedirmiş. Toydan gələn avtomobildə 5, digərində isə 4 nəfər olub. Qəzaya əsas səbəb kimi yüksək sürət və bir maşının digərinin yoluna çıxması göstərilib. Faktla bağlı rayon Prokurorluğunda cinayət işi açılıb.
