Azərbaycan, Bakı, 8 dekabr /Trend/
Bəzən həyatda heç sirkdə belə görmədiyin və normal şəkildə dərk etməyin mümkün olmadığı hadisələr baş verir. Bir oğlan uşağı Çinin Şanxay meqapolisindəki göydələnin 15-ci mərtəbəsindən yıxılıb. Yerə düşdükdən sonra o, ayağa qalxıb və demək olar, heç bir zədə almadan geriyə - evə qayıdıb.
Əgər bu barədə Çinin mərkəzi qəzetlərindən biri olan "Huantsyu şbao" qəzeti yazmasaydı, bunu, inanılması çətin olan fantastik hadisə hesab etmək olardı. Uşağın yıxılmasını çoxlu sayda şahid izləyib. Trend-in məlumatına görə, bu barədə İTAR-TASS xəbər verir.
Hadisə belə baş verib. Səhər tezdən bazara gedən 6 yaşlı He adlı oğlanın valideynləri onu evdə tək qoyurlar. Uşaq eyvana çıxaraq valideynlərinin hansı istiqamətə getdiklərinə baxmaq üçün kətilin üzərinə çıxır. Bu zaman o, müvazinətini itirir və eyvanın sürahisindən aşağı yuvarlanır.
Yoldan keçənlər yıxılan oğlana kömək etməyə tələsirlər. Onlar uşağın vəziyyətinin son dərəcə pis olduğunu güman ediblər. Lakin Henin ayağa qalxaraq ağladığını və çıxıb getdiyini görərkən adamların nə qədər təəccübləndiyini ifadə etmək çətindir. Sonra təbii ki, oğlan xəstəxanaya aparılıb. Orada həkimlər kiçik qanaxma istisna olmaqla, uşağın həyatı üçün heç bir təhlükənin olmadığını qeyd ediblər.