Azərbaycan, Bakı, 14 yanvar / Trend müxbir İ.Əlizadə/ Avropa Şurası Parlament Assambleyasının (AŞPA) qış sessiyasında Azərbaycan nümayəndə heyətinin Dağlıq Qarabağ münaqişəsi ilə bağlı hazırladığı sənədlər yayılacaq. "Bu sənədlər Ermənistanın Azərbaycana qarşı işğalı, işğal olunmuş ərazilərdə törədilən yanğınlar, mədəni-tarixi abidələrin dağıdılması ilə bağlı olacaq",- deyə bazar ertəsi Trend ə açıqlamasında Azərbaycanın AŞPA-dakı nümayəndə heyətinin üzvü Qənirə Paşayeva məlumat verib.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-93-cü illərdə isə, Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
AŞPA 2005-ci ilin yanvarında Dağlıq Qarabağ münaqişəsi ilə bağlı 1416 saylı Qətnamə qəbul edib. Qətnamədə Ermənistanın Azərbaycan ərazilərini işğal etdiyi qeyd olunub və münaqişənin həlli ilə bağlı təkliflər əks olunub. AŞPA sənədin həyata keçirilməsinə nəzarət etmək üçün Alt Komitə yaradıb.
Paşayeva qeyd edib ki, sənədlərdə AŞPA-nın qəbul etdiyi Qatnamənin həyata keçirilməsi üçün Avropa Şurasının Ermənistana qarşı təzyiq və təsirini artırması tələbi əks olunub. Sənədlərin həm AŞPA-da, həm də qurumun müxtəlif komitə və sturukturlarında yayılması nəzərdə tutulub.
"Eyni zamanda, AŞPA-nın qış sessiyasının gündəliyinə daxil edilən "Ekoloji qloballaşma və ekoloji fəaliyyət" mövzusu müzakirə olunan zaman Azərbaycanın ermənilər tərəfindən işğal olunmuş ərazilərində meşələrin yandırılması məsələsi ilə bağlı çıxışlar edəcəyik. Bu mövzu çərçivəsində su mənbələrinin qorunması məsələsi də müzakirə olunacaq. Ermənistanın işğal olunmuş ərazilərdə su mənbələrini çirkləndirməsi məsələsini də gündəmə gətirəcəyik", - deyə nümayəndə heyətinin üzvü əlavə edib.
AŞPA-nın qış sessiyası yanvarın 21-25-də Strasburqda keçiriləcək.
Azərbaycan 2001-ci ildən Avropa Şurasının üzvüdür.
