Azərbaycan, Bakı, 21 yanvar / Trend müxbir İ.Əlizadə/ Avropa Şurası Parlament Assambleyasının (AŞPA) Dağlıq Qarabağ münaqişəsi üzrə Alt Komitəsinin sədri Böyük Britaniyadan olan deputat lord Rassel Conston fevralın 3- 4- də Azərbaycanda səfərdə olacaq. "Səfərin ilkin tarixi dəqiqləşdirilib və razılaşdırılıb", - deyə bazar ertəsi Trend ə açıqlamasında Azərbaycanın AŞPA-dakı nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr daimi komissiyasının sədri Səməd Seyidov bildirib.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-93- cü illərdə isə, Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə, ATƏT-in Minsk Qrupu vasitəçilik edir.
AŞPA 2005-ci ilin yanvarında Dağlıq Qarabağ münaqişəsi ilə bağlı 1416 saylı Qətnamə qəbul edib. Qətnamədə Ermənistanın Azərbaycan ərazilərini işğal etdiyi qeyd olunub və münaqişənin həlli ilə bağlı təkliflər əks olunub. Qurum sənədin həyata keçirilməsinə nəzarət etmək üçün Alt Komitə yaradılıb. Qış sessiyasının gedişində AŞPA- nın Dağlıq Qarabağ münaqişəsi üzrə Alt Komitəsinin də iclası olacaq. İclasda münaqişənin həlli ilə bağlı görülən işlər, atılacaq növbəti addımlar müzakirə olunacaq.
Seyidov qeyd edib ki, Constonun Azərbaycana səfərində məqsəd Dağlıq Qarabağ münaqişəsinin həlli ətrafında yaranmış vəziyyəti müzakirə etməkdir. Alt Komitənin sədri Azərbaycan prezidenti İlham Əliyev, parlamentinin rəhbərliyi, parlamentdə təmsil olunan siyasi partiyaların təmsilçiləri, Azərbaycanın AŞPA- dakı nümayəndə heyəti, xarici işlər naziri Elmar Məmmədyarov və digər rəsmilərlə görüşəcəyi gözlənilir.
