Azərbaycan, Bakı, 06 iyun/ Trend , müxbir A.Qasımova/ ATƏT-in Minsk Qrupu həmsədrlərinin Ermənistan-Azərbaycan Dağlıq Qarabağ münaqişəsi regionuna səfərləri iyunun sonuna nəzərdə tutulub. Bu barədə Trend -a cümə günü, ATƏT MQ-nin amerikalı həmsdəri, ABŞ Dövlət katibi müavininin köməkçisi Metyu Brayza məlumat verib.
Brayza elektron poçtla Sankt-Peterburqdan bildirib ki, səfər iyunun sonuna planlaşdırılsa da, dəqiq tarix müəyyən edilməyib.
Cümə günü Sankt-Peterburqda Azərbaycan dövlətinin başçısı İlham Əliyev və fevralda Ermənistanın prezidenti seçilmiş Serj Sərkisyanın birinci görüşü baş tutub. Görüş əvvəlcə ATƏT vasitəçilərinin iştirakı ilə keçirilib, sonra isə təkbətək formatda davam edib. Prezidentlərin görüşü ərəfəsində tərəflərin XİN rəhbərləri, həmçinin, ATƏT MQ-nin həmsədrləri danışıqlar aparıblar.
İki Cənubi Qafqaz ölkəsiarasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Dağlıq Qarabağ və ona bitişik yeddi rayon - Azərbaycan ərazisinin 20 faizi Ermənistan Silahlı Qüvvələrinin işğalı altındadır. 1994-cü ilin mayında tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə, hələ ki nəticəsiz, sülh danışıqları aparılır.
